कन्हान नदीच्या पात्रातून अवैध उत्खनन करून रेती चोरणाऱ्या टोळीला खापरखेडा पोलिसांनी गजाआड केले आहे. या प्रकरणात एकूण ६० लाख १२ हजार रुपयांचा ऐवज जप्त करण्यात आला असून, चार जणांना अटक करण्यात आली, तर एक जण पसार झाला.
नईमुद्दीन जलीलउद्दीन शेख (४०), एजाज अन्सारी (२३), उमर इमामुद्दीन सिद्दिकी (२०, तिघेही रा. वलनी) अशी आरोपींची नावे आहेत. प्रोक्लेन चालक विनोद भारद्वाज पळून जाण्यात यशस्वी झाला. खापरखेडा पोलिस स्टेशनअंतर्गत कन्हान नदीच्या पात्रात वलनी घाट येथे लिलाव न झालेली रेती प्रोक्लेनच्या साह्याने काढून चोरून नेण्यात येत असल्याची गुप्त माहिती गस्तीवर असलेल्या पोलिस पथकाला मिळाली होती. त्यानुषंगाने सहायक पोलिस निरीक्षक नितीनचंद्र राजकुमार यांच्या नेतृत्वात पोहवा लक्ष्मीप्रसाद दुबे, सूरज परमार, शिपाई शशी शेंडे, सुनील मिश्रा, रामराव आडे, प्रणयसिंग बनफर, बंडू कोकाटे, वीरेंद्र नरड यांचा समावेश असलेले पथक १ जुलै रोजी पहाटे ३ वाजताच्या सुमारास वलनी घाटावर पोहचले. त्यावेळी त्यांना रेतीचे उत्खनन होत असल्याचे दिसले. त्यामुळे तेथे असलेल्यांना ताब्यात घेऊन चौकशी केली असता, त्यांच्याकडे रेती नेण्याचा कुठलाही परवाना नव्हता व वलनी येथील मोहमद लतीफ अन्सारी हफीज अन्सारी याच्या सांगण्यावरून ते रेती घेऊन जात होते. पोलिसांनी या तिघांना ताब्यात घेतले तसेच दोन ट्रक, एक प्रोक्लेन मशिन व सहा ब्रास रेती असा एकूण ६० लाख १२ हजार रुपयांचा ऐवज जप्त केला.
मोबाइल अॅप डाउनलोड करा आणि राहा अपडेट