मेट्रो रेल्वेसाठी लागणारे साहित्य वेगवेगळ्या देशांमधून आयात करावे लागणार आहे. मेट्रो रेल्वे प्रकल्प साकारताना निकृष्ट प्रतीचे सामान येऊन प्रकल्प अडचणीत सापडू नये, यासाठी विशेष खबरदारी घेण्यात येणार आहे. परदेशातून आयात होणाऱ्या सामानांची तपासणी करण्यासाठी कंपनीची निवड करण्यात येणार असून इटली या देशाने यासाठीचा प्रस्ताव एनएमआरसीएलकडे पाठविला आहे.
रोलिंग स्टॉक, रेल्वेचे डब्बे यासह विविध साहित्याची तपासणी करण्यासाठी इटलीची इटाल सर्टिफल ही कंपनी इच्छुक आहे. सध्या भारतातील इटलीची ब्युरो व्ह‌िरीटास ही कंपनी मेट्रो रेल्वे प्रकल्पासाठी तात्पुरत्या स्वरूपात टेस्टिंगचे काम करीत आहे. कायमस्वरूपी यंत्रणा तयार करून तपासणीची प्रक्रिया राबविण्यात येणार असल्याचे एनएमआरसीएलचे व्यवस्थापकीय संचालक ब्रिजेश दीक्षित यांनी सांगितले.
डब्ब्यांसाठी विविध देशांशी चर्चा ऑटोमोटिव्ह चौक ते मिहान आणि प्रजापतीनगर ते लोकमान्यनगर या दोन मार्गांवर २४ तासांपैकी १९ तास मेट्रो रेल्वे धावणार आहे. २१.६४ मीटर लांबीच्या तीन डब्यांच्या मेट्रो रेल्वेत एकाच वेळी ७६४ प्रवासी घेऊन जाण्याची क्षमता असणार आहे. मेट्रो रेल्वेसाठी स्टेनलेस स्टीलचे डबे वापरण्याचे नियोजन आहे. या डब्यांसाठी चीन, फ्रान्स, कॅनडा, जर्मनी या देशांची चर्चा सुरू आहे. जगात मेट्रो रेल्वेचे डब्बे बनविणाऱ्या २० कंपन्या आहेत. भारताशी करार करण्यात ६ कंपन्या इच्छुक असल्याचे दीक्षित यांनी सांगितले.
मोबाइल अॅप डाउनलोड करा आणि राहा अपडेट