हल्ल्याची घटना ४ डिसेंबर २०१३ रोजी रात्री १० वाजताच्या सुमारास हिंगणा पोलिस ठाण्याच्या हद्दीतील सुकळी धारापुरे गावाच्या मार्गावरील आमगाव येथे घडली होती. सायरे 'ऑल इंडिया रेडिओ' दिल्ली येथे कार्यरत होते. ते मूळचे नागपूरचे असल्याने त्यांचे गोकुळपेठेत घर आहे. हे घर त्यांनी आरोपी प्रॉपर्टी डीलर ईश्‍वर मनवर याला घटनेच्या चार वर्षांपूर्वी दोन हजार रुपये महिन्याप्रमाणे भाड्याने दिले होते. सायरे यांना हे घर विकायचे असल्याने त्यांनी ग्राहक शोधण्यासाठी मनवरच्या मागे तगादा लावला होता. त्यामुळे आरोपी चिडला होता. सायरे यांना कायमचे संपवण्याच्या हेतूने आरोपीने घटनेच्या दिवशी 'घर विकत घेणाऱ्या एका पार्टीला भेटण्यास जायचे आहे', असे मोबाइलवर खोटे सांगितले होते. त्यांना हिंगणा मार्गावरील बब्बू हॉटेलजवळ थांबण्यास सांगितले होते. आरोपीने आपल्या मारोती ओमनी कारने बब्बू हॉटेल येथे जाऊन सायरे यांना कारमध्ये बसवले. कार पंक्चर झाल्याचा बहाणा करून त्यांना खाली उतरवले. सोबत आणलेल्या कपडे धुण्याच्या लाकडी फळीने सायरे यांच्या डोक्यावर प्रहार करून त्यांना गंभीर जखमी केले. सायरे बेशुद्ध झाल्यानंतर त्यांचे एटीएम कार्ड काढून त्यांच्या खात्यातून १५ हजार रुपये काढून घेतले. त्यानंतर आरोपी घटनास्थळावरून पसार झाला.
हिंगणा पोलिसांनी याप्रकरणी भादंविच्या ३०७, ३९४ कलमान्वये गुन्हा दाखल करून ईश्‍वर मनवर याला अटक केली होती. या प्रकरणाचा तपास पोलिस उपनिरीक्षक गणेश काळे यांनी करून न्यायालयात आरोपीविरुद्ध आरोपपत्र दाखल केले. न्यायालयात एकूण आठ साक्षीदार तपासण्यात आले. उपलब्ध साक्षीपुराव्यांवरून न्यायालयाने आरोपीला भादंविच्या ३२४ (मारहाण) कलमांतर्गत तीन वर्षे सश्रम कारावास, तीन हजार रुपये दंड अशी शिक्षा सुनावली. परंतु, भादंविच्या ३०७ (खुनाचा प्रयत्न) आणि ३९४ (जखमी करून जबरी चोरी) या कलमांतर्गतच्या गुन्ह्यातून निर्दोष सुटका केली. न्यायालयात सरकारच्यावतीने अतिरिक्त सरकारी वकील संदीप डोंगरे यांनी सरकारची बाजू मांडली.
मोबाइल अॅप डाउनलोड करा आणि राहा अपडेट