'गेल्या निवडणुकीत काँग्रेस तर बुडाली, मात्र सोबत आम्हांलाही बुडवले', असा घणाघाती आरोप करत राष्ट्रवादी काँग्रेसचे नेते प्रफुल्ल पटेल यांनी गेल्या निवडणुकीतील पराभवाचे खापर काँग्रेस पक्षावर फोडले आहे. सध्याच्या परिस्थितीचा विचार करता काँग्रेस पक्षामध्ये आता काहीच उरलेले नाही, देशात आणि राज्यात काँग्रेसचे वर्चस्व संपले आहे अशा शब्दांत पटेल यांनी काँग्रेस पक्षाचे वाभाडे काढले आहेत. पटेल यांच्या काँग्रसवरील जोरदार टीकेमुळे आगामी काळात दोन्ही पक्षांदरम्यानचे संबंध अधिक बिघडण्याची शक्यता निर्माण झाली आहे.
प्रफुल्ल पटेल अकोल्यात आयोजित करण्यात आलेल्या राष्ट्रवादी काँग्रेस पक्षाच्या कार्यकर्ता मेळाव्यात बोलत होते. कार्यकर्त्यांना संबोधित करताना त्यांनी काँग्रेस पक्षावर जोरदार प्रहार केले. काँग्रेस पक्षासोबत राहिल्यानेच गेल्या पाच वर्षांच्या काळात राष्ट्रवादी काँग्रेसचे सर्वाधिक नुकसान झाले असल्याचेही ते म्हणाले.
पृथ्वीराज चव्हाणांवर केले आरोप
पृथ्वीराज चव्हाणांसारख्या नेत्यांनीच राष्ट्रवादी काँग्रेसला नेहमी बदनाम करण्याचा प्रयत्न केला असा थेट आरोपही पटेल यांनी केला. चव्हाण यांनीच राष्ट्रवादी काँग्रेसच्या अनेक नेत्यांना चौकशीच्या फेऱ्यात अडकवले असे म्हणत काँग्रेस पक्षानेच राष्ट्रवादी काँग्रेस पक्षाच्या नेत्यांमागे चौकशीचे शुक्लकाष्ठ लावल्याची टीकाही केली.
पटेल पुढे म्हणाले, 'आघाडी सरकारच्या काळात काँग्रेस पक्षाने आमची बदनामी करण्यातच धन्यता मानली. आमचे सरकार असताना काँग्रेस पक्ष शिवसेना आणि भाजप यांच्यापेक्षा राष्ट्रवादी काँग्रेस पक्षालाच अधिक लक्ष्य करत होता. पृथ्वीराज चव्हाणांसारख्या नेत्यांनी आमच्या पक्षाची बदनामी करण्याचे षडयंत्र रचले होते. अनेत घोटाळ्यांमध्ये आमच्या नेत्यांना नाहक गोवण्यात आले.'
काँग्रेस पक्षाने राष्ट्रवादी काँग्रेसला बुडवले असले, तरी आगामी काळात आपला पक्ष नव्याने भरारी घेईल असा आशावादही पटेल यांनी मेळाव्यात व्यक्त केला.
मोबाइल अॅप डाउनलोड करा आणि राहा अपडेट