मुख्यमंत्री देवेंद्र फडणवीस यांच्या नेतृत्वाखालील युती सरकारला दोन वर्षे पूर्ण होत असतानाच, नागपूरच्या विविध विकासकामांचा शुभारंभ करण्यासाठी पंतप्रधान नरेंद्र मोदी ऑक्टोबर महिन्याच्या दुसऱ्या आठवड्यात शहरात येण्याची शक्यता वर्तविली जात आहे. पंतप्रधानांच्या आगमनाच्या तयारीसाठी प्रशासन कामाला लागले असून, पंतप्रधानांच्या या दौऱ्यात महापालिका निवडणुकांचा शंखही फुंकण्यात येणार असल्याची चर्चा आहे.
नागपूर मेट्रोच्या भूमिपूजनाच्या कार्यक्रमानंतर पंतप्रधान नरेंद्र मोदी दुसऱ्यांदा नागपुरात येत आहेत. यावेळी त्यांच्याकरिता भरगच्च कार्यक्रम आखण्यात येत आहेत. त्यात मौदा येथील एका भव्य प्रकल्पाचे उद्घाटन, आयआयआयएम, आयआयआयटी, नॅशनल लॉ स्कूल या संस्थांच्या इमारत बांधकामाचे भूमिपूजन, महापालिकेने अंबाझरी तलावाच्या पायथ्याशी उभारलेल्या स्वामी विवेकानंद स्मारकाचे उद्घाटन, नागपूर स्मार्ट सिटी व स्वच्छ सिटी अभियानाचा शुभारंभ, अशा कार्यक्रमांचा त्यात समावेश आहे. तसेच दिव्यांगांना जयपुरी फूट देण्याच्या उपक्रमातही पंतप्रधानांना आमंत्रित करण्यात येत आहे.
राज्यातील महापालिका निवडणुका मार्च २०१७ मध्ये होत असताना त्यापूर्वी पंतप्रधान मोदी यांच्या हस्ते शहरातील प्रमुख विकासकामांचा शुभारंभ करण्याची योजना भाजपने आखली आहे. त्यासोबतच, मुख्यमंत्री देवेंद्र फडणवीस यांच्या सरकारला दोन वर्षे पूर्ण होत असल्याने त्यांच्या नेतृत्वावरही पंतप्रधानांकडून त्यांना शाबासकी मिळावी, हादेखील उद्देश असल्याची चर्चा शहरात आहे.
दरम्यान, विश्वेश्वरैय्या राष्ट्रीय तंत्रज्ञान संस्थेने (व्हीएनआयटी) दीक्षांत समारंभाकरिता पंतप्रधान मोदी यांना आमंत्रित केले होते. परंतु, नियोजित तारखेला पंतप्रधानांना नागपुरात येणे शक्य नसल्याने पंतप्रधान कार्यालयाने ऑक्टोबरच्या दौऱ्यात संस्थेला भेट देण्यात येईल, असे कळविले आहे. त्या भेटी व्हीआयआयटी, आयआयएम, आयआयआयटीच्या विद्यार्थ्यांसोबत पंतप्रधान स्टार्ट अप इंडिया, स्कील इंडिया आणि डिजिटल इंडिया यासारख्या फ्लॅगशीप उपक्रमांबाबत संवाद साधतील, अशी माहिती सूत्रांनी दिली.
मोबाइल अॅप डाउनलोड करा आणि राहा अपडेट