म.टा. विशेष प्रतिनिधी, नागपूर
महापालिका व जिल्हा परिषदेच्या आगामी निवडणुकांच्या तयारींतर्गत काँग्रेसने पालक पदाधिकारी व जिल्हा प्रभारींच्या नियुक्त्यांसह तब्बल २१ विभागांची नव्याने पुनर्रचना करून जबाबदाऱ्या निश्चित केल्या आहेत. भाजपने काँग्रेस मुक्त भारतची घोषणा दिल्यानंतर त्यास टक्कर देण्यासाठी गाव तेथे काँग्रेस कमेटी व शहरात वॉर्ड तेथे काँग्रेस कमेटी हे अभियान राबवण्याचा निर्धार काँग्रेसने केला आहे.
प्रदेशाध्यक्ष अशोक चव्हाण यांनी राज्यातील सर्व पदाधिकारी व सदस्यांची अलीकडेच बैठक घेऊन वित्तपासून ते शिस्तभंगाच्या कारवाईसाठी २१ विभागांची पुनर्रचना केली. जिल्हा परिषद व महापालिका निवडणुकांना ६ ते ८ महिने असले तरी, त्याची तयारी आतापासून करण्याची सूचना त्यांनी केली. अखेरच्या घटकापर्यंत पोहोचण्याचा काँग्रेसचा प्रयत्न आहे. प्रभारींना महिन्यातून दहा दिवस जिल्ह्यात मुक्काम करावयाचा असून वॉर्ड, बुथची रचना करण्यासोबतच राजकीय स्थितीचा अहवाल प्रदेशला पाठवायचा आहे. चव्हाण यांनी मोठ्या प्रमाणात समर्थकांना संधी देऊन सर्वांना चार्ज करण्याचा प्रयत्न केला आहे.
महापालिका निवडणुकीसाठी सर्वच पक्षांची जोरदार तयारी सुरू आहे. भाजपने प्रभागनिहाय कार्यकर्त्यांचे अभ्यासवर्ग सुरू केले तर, काँग्रेसने एकेका जिल्ह्यात दोन-तीन प्रभारी नियुक्त करून संघटेनवर लक्ष केंद्रित केले आहे. विधानसभेतील काँग्रेसचे उपनेते विजय वडेट्टीवार नागपूरचे पालक आहेत. प्रदेश सरचिटणीस झिया पटेल, सचिव रवींद्र दरेकर आणि विनोद जैन यांच्याकडे प्रभारीपदाची जबाबदारी सोपवण्यात आली आहे. नागपूर ग्रामीणच्या प्रभारीपदी माजी आमदार नरेश ठाकरे यांची नियुक्ती करण्यात आली आहे.
माजी मंत्री नितीन राऊत भंडारा, गोंदिया व वर्धा जिल्ह्याचे पालक पदाधिकारी आहेत. प्रफुल्ल गुडधे पाटील, मुजीब पठाण आणि आसावरी देवतळे भंडाऱ्याच्या प्रभारी आहेत. प्राचार्य बबनराव तायवाडे व उमाकांत अग्निहोत्री गोंदियाचे प्रभारी आहेत. माजी आमदार एस.क्यू. झमा व प्रमोद तितरमारे चंद्रपूरचे प्रभारी आहेत. सुरेश भोयर आणि योगेंद्र भगत यांच्याकडे गडचिरोलीची जबाबदारी आहे. बंडू सावरबांधे व अतुल कोटेचा वर्धाचे प्रभारी आहेत.
नागपूर विभागासाठी मुश्ताक अंतुले आणि अमरावती विभागासाठी संजय चौपाने विभागीय समन्वयक आहेत. रामकिसन ओझा यांच्याकडे प्रदेशाध्यक्ष कामकाज विभाग तसेच, अभिलेख आणि माहिती व तंत्रज्ञान विभागाची जबाबदारी आहे. नितीन कुंभलकर यांना काँग्रेसच्या मालमत्तेची माहिती व त्यांच्या अडचणी जाणून घ्यायच्या आहेत. नियोजनमध्ये नितीन राऊत, नरेश पुगलिया, सुबोध मोहिते आणि बंडू सावरबांधे आहेत. विधिमंडळ कामकाज विभागाची संजय खोडके तर, विधी विभागाची जबाबदारी आसिफ कुरेशी यांच्याकडे आहे. शोध व विश्लेषण विभागात प्रवक्ते सुधीर ढोणे आणि सचिन सावंत आहेत. अभिजित सपकाळ सोशल मीडिया तर, अभिजित देशमुख यांच्याकडे मीडियाची जबाबदारी आहे. शिस्तपालन विभागाची जबाबदारी गेव्ह आवारी आणि लक्ष्मणराव तायवाडे यांच्याकडे आहे.
मोबाइल अॅप डाउनलोड करा आणि राहा अपडेट