शहरातील वाढत्या वाहनांच्या संख्येमुळे दोन उपप्रादेशिक परिवहन कार्यालय असावे, यादृष्टीने नागपूर शहर पूर्व विभागासाठी स्वतंत्र कार्यालयाची निर्मिती करण्यात आली असून या कार्यालयामध्ये देशातील परिवहन विभागाच्या अत्याधुनिक असलेल्या सर्व सुविधा उपलब्ध करून देण्यात येतील, अशी माहिती मुख्यमंत्री देवेंद्र फडणवीस यांनी रविवारी येथे दिली.
चिखली येथे १८ हजार चौरस मीटर जागेवर बांधण्यात येणाऱ्या पूर्व नागपूर शहर उपप्रादेशिक परिवहन कार्यालयाच्या इमारतीच्या बांधकामाचे भूमिपूजन मुख्यमंत्री देवेंद्र फडणवीस यांच्या हस्ते झाले. त्यावेळी ते बोलत होते. अध्यक्षस्थानी केंद्रीय मंत्री नितीन गडकरी होते. तर विशेष अतिथी म्हणून पालकमंत्री चंद्रशेखर बावनकुळे, अर्थ मंत्री सुधीर मुनगंटीवार, पर्यटन मंत्री जयप्रकाश रावल, आदिवासी विकास राज्यमंत्री राजे अम्ब्रीशराव अत्राम, महापौर प्रवीण दटके, आमदार कृष्णा खोपडे, प्रा. अनिल सोले, परिवहन विभागाचे अपर मुख्य सचिव सुधीर श्रीवास्तव, परिवहन आयुक्त श्याम वर्धने तसेच नागपूर सुधार प्रन्यासचे सभापती दीपक म्हैसेकर आदी उपस्थित होते. आ. खोपडे यांनी प्रास्ताविकात पूर्व नागपूरमध्ये उपप्रादेशिक परिवहन कार्यालयाची सुरुवात केल्यामुळे येथील जनतेला सहज सुलभपणे सुविधा उपलब्ध झाल्या आहेत, असे सांगितले. नागपूर सुधार प्रन्यासच्या या जागेवर ही इमारत बांधण्यात येणार असून दोन मजली असलेल्या या इमारतीमध्ये तळमजल्यावर वेटिंग हॉल, परमिट सेक्शन, ट्रान्सपोर्ट सेक्शन, नॉन ट्रान्सपोर्ट सेक्शन, परवाना सेक्शन आदी सुविधा राहणार असून पहिल्या मजल्यावर कॉन्फरन्स हॉल बांधण्यात येणार आहे.
यावेळी स्थायी समितीचे अध्यक्ष सुधीर (बंडू) राऊत, नगर रचना सहसंचालक, एन. एस. अढारी, प्रादेशिक परिवहन अधिकारी, डॉ. डी. टी. पवार, शरद जिचकार, उपप्रादेशिक परिवहन अधिकारी, बेलसरे, रवींद्र भुयार, विजय चव्हाण, प्रशांत झाडे, निमजे, नागपूर सुधार प्रन्यासचे अधीक्षक अभियंता अशोक गौर, गुज्जलवार, कार्यकारी अभियंता राजेश मेघराजानी उपस्थित होते.
मोबाइल अॅप डाउनलोड करा आणि राहा अपडेट