आता राज्यातील धरणांचे पाणी तळ गाठू लागले आहे. लघु, मध्यम व मोठ्या धरण प्रकल्पांत केवळ १५ टक्केच उपयुक्त पाणीसाठा उरला आहे. मराठवाड्यात तर दुष्काळाचे संकट गंभीर झाले असून विदर्भातील धरणांच्या जलसाठ्याची स्थितीही अतिशय खालावली आहे. राज्यात ३ हजार ७९८ गावे व ६ हजार २१७ वाड्यात टँकर लागले आहेत. विदर्भात २०२ गावात टँकरने पाणीपुरवठा सुरू झाला असून पश्चिम विदर्भाची असून स्थितीही गंभीर होत आहे.
हवामान खात्याने यंदा मान्सून वेळेवर आणि समाधानकारक पडणार असल्याचा अंदाज वर्तविला आहे. पण ते भाकीत कितपत खऱ्या पातळीवर उतरेल हे तूर्त सांगणे कठीण आहे. मात्र आता धरणात उपलब्ध असलेला पाणीसाठा आणि मान्सूनचे आगमन यामधील काळात पाणी नियोजन करताना राज्य सरकारची मात्र खरी कसोटी आहे. राज्यातील २ हजार ५५९ प्रकल्पांमध्ये एकूण ३७ हजार ९४१ दशलक्ष घनमीटर जलसाठा क्षमता आहे. आज १५ टक्केवारीने केवळ ५ हजार ६३३ दशलक्ष घनमीटर साठा उरला आहे. २०१४ मध्ये हा पाणीसाठा याच कालावधीत २९ टक्के, तर २०१५ मध्ये २५ टक्के होता. मराठवाड्यात तर केवळ २ टक्केच जलसाठा असून पुणे, नाशिक, अमरावती विभाग १६ टक्क्यांखाली आले आहे. त्यामुळे गंभीर संकट निर्माण झाले आहे.
राज्यात ३ हजार ७९८ गावे व ६ हजार २१७ वाड्यात टँकर लागले आहेत. त्यात औरंगाबाद विभागात सर्वाधिक २ हजार ५०३ व ९२२ वाड्यात ३ हजार ३३८ टँकर लागले आहेत.नाशिक विभागात ६५९ गावे व २ हजार ७६८ वाड्यात ९१२ टँकर लागले आहेत. पुणे विभागात ३१७ गावे व २ हजार १६१ वाड्यात ३५४ टँकरने पाणी पुरवठा केला जात आहे.ठाण्यासह कोकण विभागात ११७ गावे व ३६४ वाड्यात ७६ टँकर लागले आहेत.
पश्चिम विदर्भात स्थिती गंभीर अमरावती विभागात आता एकूण केवळ १५ टक्केच जलसाठा उरला आहे. परिणामी या भागातील १९२ गावात १९१ टँकर लागले असून त्यानेच पाणीपुरवठा सुरू झाला आहे. त्यात वाशीम जिल्ह्यातील प्रत्येकी ६३ , बुलडाणा जिल्ह्यातील ६८, अमरावती जिल्ह्यातील ११ यवतमाळ जिल्ह्यातील ४४ तर अकोला जिल्ह्यातील ६ गावांचा समावेश आहे. नागपूर विभागातील तूर्त १० गावात टँकरने पाणीपुरवठा सुरू झाला आहे.
धरणांची स्थिती (टक्केवारी) कोकण विभाग ४० मराठवाडा विभाग ०२ नागपूर विभाग २३ अमरावती विभाग १५ नाशिक विभाग १४ पुणे विभाग १४ इतर धरणे १९
मोबाइल अॅप डाउनलोड करा आणि राहा अपडेट