आरटीई शुल्काचा परतावा वेळेत मिळावा, यासाठी सातत्याने आंदोलन करीत असलेल्या मेस्टा संघटनेने फीचे पैसे बुडविणाऱ्या पालकांवर कारवाई करावी, अशी मागणी केली आहे. जे पालक फीचे पैसे देणार नाहीत, त्यांच्या पाल्यांचे प्रवेश दुसऱ्या शैक्षणिक वर्षात रद्द केले जावेत, अशी मागणी या संस्थाचालकांनी केली आहे. राज्यातील इंग्रजी शिक्षण संस्थांच्या संचालकांनी पुन्हा एकदा आंदोलनाचे बिगुल फुंकले असून, बुधवार, ७ सप्टेबर रोजी राज्यातील प्रत्येक जिल्हा ठिकाणी हे आंदोलन केले जाणार आहे.
महाराष्ट्र राज्य इंग्रजी शाळा संस्थाचालक संघटना (मेस्टा) ही इंग्रजी शाळांची संघटना असून, राज्यभरातील विविध इंग्रजी शाळा या संघटनेत सहभागी होणार आहेत. वारंवार आंदोलने करूनही राज्य शासन कोणतीही कारवाई करीत नसल्याने या शाळांमधील, विद्यार्थी, पालक, शिक्षक आणि संस्थाचालकांनी हेळसांड होत असल्याचे या आरोप मेस्टाने केला आहे. त्यामुळे, बुधवारी राज्यातील सर्व शिक्षणाधिकारी कार्यालयांवर इंग्रजी शाळांचे संस्थाचालक आंदोलन करणार आहे.
या आंदोलनाच्या निमित्ताने मेस्टाने आपल्या मागण्या पुन्हा एकदा रेटल्या आहे. शाळेचे शुल्क न भरणाऱ्या पालकांच्या पाल्यांचे प्रवेश दुसऱ्या शैक्षणिक वर्षात रद्द केले जावेत, असे 'मेस्टा'ने म्हटले आहे. शाळांमध्ये पालक शिक्षक संघटना शुल्क विनियम कायदा रद्द केला जावा किंवा शिथिल केला जावा. शासनाच्या शाळेतील विद्यार्थ्यांवर होणारा प्रतिविद्यार्थी वार्षिक खर्च अंदाजे रुपये ९६ हजार रुपये होतो. हा खर्च किंवा शाळेने ठरवलेली फी यापैकी जी रक्कम कमी असेल ती शिक्षण हक्क कायद्यानुसार मोफत प्रवेश घेणाऱ्या बालकांना अदा करावी, असेही मेस्टाने म्हटले आहे. याशिवाय, शाळांसाठी स्वतंत्र संरक्षण कायदा करावा, पूर्व प्राथमिक वर्गातील प्रवेशांचा मागील चार वर्षांचा परतावा द्यावा, एका शाळेतून दुसऱ्या शाळेत प्रवेश घेताना पूर्वीच्या शाळेचा दाखला अनिवार्य करावा, शाळेच्या इमारतीला लावलेले व‌िजेचे व्यावसायिक दर आणि शाळांवर लादण्यात आलेले सर्व प्रकारचे कर रद्द करावे, विद्यार्थी वाहतूक करणाऱ्या वाहनांवर पथकराव्यतिरिक्त कोणतेही कर लावण्यात येऊ नयेत, आरटीई कायद्याप्रमाणे आर्थिक दुर्बल घटकांतील मुलांना शासनाने शालेय साहित्य, पुस्तके व गणवेश पुरवावेत आणि आरटीई प्रवेश प्रक्रिया सत्र सुरू होण्यापूर्वीच पूर्ण करावी, अशी मागणी मेस्टाने केले आहे. बुधवारी राज्यातील सर्व शिक्षणाधिकारी कार्यालयांसमोर हे आंदोलन केले जाणार आहे.
मोबाइल अॅप डाउनलोड करा आणि राहा अपडेट