या मंदिराला मोठा इतिहास आहे. पांढरकवडाजवळील पाटणबोरी येथे त्रिंबकस्वामी महाराज होऊन गेले. एकदा अकोल्याचे ब्राह्मण त्यांच्या मठात आल्यावर त्यांनी गणेशाची मूर्ती महाराजांना दिली. संन्यासी असल्याने महाराजांच्या अंगावर केवळ लंगोटच होते. मूर्ती नेमकी कुठे ठेवावी हा प्रश्न होता. म्हणून महाराजांनी ती मूर्ती मुखात ठेवली. त्यानंतर गीरी पर्वतावर २१ दिवस तप केला. तेथून त्यांनी थेट चंद्रपूर गाठले. डेहनकर यांच्या कुटुंबाला त्यांनी स्वतःजवळील सर्व देव दिले. येथेच त्यांनी संजीवन समाधी घेतली. पण, हे मंदिर संन्याशाचे असल्याने पुढे कोण जाणार म्हणून सुमारे १५० वर्षांपूर्वी गणपत उर्फ बाबाजी डेहनकर यांनी गणपतीची प्राणप्रतिष्ठा केल्याची माहिती आहे. बाबाजी डेहनकर यांच्या पत्नीच्या हाताने या गणपतीने खीर खाल्ल्याची आख्यायिका आहे. सध्या डेहनकर कुटुंबीयांची ११वी पीढी सेवेत असून आजही त्रिंबकस्वामी महाराजांच्या मुखातील गणपती पूजेत आहे. नवसाला पावणारा गणपती म्हणून हे जागृत देवस्थान मानले जाते. येथे भाद्रपद वद्य पंचमी ते भाद्रपद वद्य द्वादशी या कालावधीत महाराजांचा पुण्यतिथी उत्सव विविध उपक्रमांनी साजरा केला जातो. अलीकडेच मंदिराचा जीर्णोद्धार करण्यात आला आहे. याच परिसरात गणेशाला प्रिय असणारे शमीचे झाड सुमारे १५० वर्षांपासूनची साक्ष देत उभे आहे, हे विशेष.
- पंकज मोहरीर, चंद्रपूर
मोबाइल अॅप डाउनलोड करा आणि राहा अपडेट