संपत्तीच्या वादातून मुलाने वृद्ध वडिलांना घराबाहेर काढल्याची धक्कादायक घटना प्रतापनगरमधील गुडधे ले-आउट भागात उघडकीस आली आहे. याप्रकरणी पोलिसांनी मुलाविरुद्ध वृद्धापकाळात वडिलाचा परित्याग केल्याप्रकरणाचा गुन्हा दाखल केला आहे. नागपुरातील अशाप्रकारचा हा पहिलाच गुन्हा होय. नितीन बद्रीप्रसाद शहा (४८) असे गुन्हा दाखल करण्यात आलेल्या मुलाचे तर बद्रीप्रसाद गंगाभूषण शहा (७८) असे वडिलांचे नाव आहे.
बद्रीप्रसाद हे आयुध निर्माणीतून निवृत्त झाले आहे. त्यांना सचिन, नितीन, धीरेंद्र व नलीन ही चार मुले आहेत. सचिन हे विदेशात राहतात. नितीन लॅण्डस्केप डिझायनर आहेत. नलीन हा खासगी कंपनीत काम करतो, तर धीरेंद्र हे एलआयसी एजन्ट असून ते मनीषनगर येथे राहातात. गुडधे ले-आउट भागात बद्रीप्रसाद यांचे दोनमजली घर आहे. ते नितीनच्या नावावर आहे. तळमजल्यावर बद्रीप्रसाद, पहिल्या माळ्यावर नलीन तर दुसऱ्या माळ्यावर नितीन राहतात. रविवारी दुपारी बद्रीप्रसाद व नलीन महाप्रसादाला बाहेर गेले. यादरम्यान नितीन यांनी बद्रीप्रसाद यांच्या घरातील साहित्य घराबाहेर काढले व मुख्य दरवाजाला कुलूप लावले. काही वेळाने बद्रीप्रसाद हे परतले असता. दरवाजाला कुलूप दिसले. साहित्य घराबाहेर होते. नितीन त्यांना घरात घेण्याच्या तयारीत नव्हता. बद्रीप्रसाद यांनी त्यांना कुलूप उघडण्यास सांगितले. त्यांनी नकार दिला. त्यानंतर बद्रीप्रसाद यांनी प्रतापनगर पोलिस स्टेशन गाठले. वडील मुलाविरुद्धच तक्रार देत असल्याने पोलिसांमध्येही खळबळ उडाली. बद्रीप्रसाद यांच्या तक्रारीवरून पोलिसांनी गुन्हा दाखल करून तपास सुरू केला आहे.
मोबाइल अॅप डाउनलोड करा आणि राहा अपडेट