विद्युत विकासाच्या पायाभूत सुविधा उभारण्याच्या उद्देशाने केंद्र सरकारच्या एकात्मिक ऊर्जा विकास कार्यक्रमाअंतर्गत २०० कोटींचा निधी नागपूरला मिळाला आहे. महावितरणने यासंदर्भातील प्रस्ताव काही महिन्यांपूर्वी केंद्राकडे पाठवला होता.
गेल्या काही वर्षांत वीजग्राहकांच्या संख्येत वाढ झाली आहे. त्याचबरोबर विजेची निरनिराळी उपकरणेही वापरण्यात येतात. या पार्श्वभूमीवर वीजग्राहकांना नियमितपणे अखंडित व योग्य दाबाचा वीजपुरवठा मिळवण्यासाठी शहरात केंद्राच्या एकात्मिक ऊर्जा विकास योजनेला मंजुरी मिळाली आहे. पायाभूत विद्युत सेवांचा दर्जा सुधारल्यास तांत्रिक कारणाने वीज पुरवठा खंडित होण्याचे प्रकार होणार नाहीत. दरम्यान, या निधीतून पाच नवे सबस्टेशन्स उभारण्यात येणार आहेत. यामध्ये दीक्षाभूमी, खामला, धरमपेठ, कळमना आणि सुभाननगरचा यात समावेश आहे. यातील पहिले दोन सबस्टेशन काँग्रेसनगर झोनमध्ये असून, हा भाग महावितरणकडे आहे. तर उर्वरित तीन एसएनडीएलची फ्रॅन्चाइसी असलेल्या भागात आहेत. या योजनेअंतर्गत दोन ट्रान्सफॉर्मर्सही लावण्यात येणार आहेत. दहा एमव्हीए क्षमतेचे दोन ट्रान्सफॉर्मर काँग्रेसनगर झोनमध्ये लावण्यात येणार आहे. तर उर्वरित तीन भागांत दहा एमव्हीएचा एकच ट्रान्सफॉर्मर लावण्यात येणार असल्याची माहिती आहे.
सबस्टेशन्सबरोबर मोठ्या प्रमाणात भूमिगत व ओव्हरहेड केबल्सही टाकण्यात येणार आहे. त्याचबरोबर नवे वितरण ट्रान्सफॉर्मर्सही लवकरच लावण्यात येणार असल्याची माहिती आहे. नव्याने लावण्यात येणाऱ्या ओव्हर केबल अत्यंत वैशिष्ट्यपूर्ण असतील. बरेचदा आकडा टाकून वीजचोरीचे प्रकार करण्यात येतात. मात्र, या केबल्सच्या माध्यमातून वीजचोरी करता येणार नसल्याची माहिती आहे. या केबलबरोबरच हाय वोल्टेज वितरण प्रणाली असलेले केबल्सही टाकण्यात येणार आहेत. केंद्राच्या या नव्या योजनेअंतर्गत सबस्टेशन्सकरिता निविदा यापूर्वीच काढण्यात आल्या आहेत. त्यामुळे आता लवकरच केबल व ट्रान्सफॉर्मरच्या निविदा काढण्याची प्रक्रिया सुरू असल्याची माहिती सूत्रांनी दिली.
मोबाइल अॅप डाउनलोड करा आणि राहा अपडेट