आधी आयटी कंपन्या, एमआरओ, त्यानंतर रिलायन्सचा एअरोस्पेस हब, मग पतंजलीचा फूड पार्क अशा बहुरंगी उद्योगांचा हब मिहान-सेझमध्ये तयार होत असताना आता 'हेल्थ टूरिझम'देखील विकसित होणार आहे. सेझमधील १५० एकरांवर इंडो-युके हेल्थ रिसर्च इन्स्टिट्युट येत असून, लवकरच त्यावर शिक्कामोर्तब होणार आहे.
मिहान प्रकल्पाची रचना झाली, त्याचवेळी येथे विविध प्रकारच्या हबची रचना करण्यात आली होती. पण, प्रकल्प हवा तसा विकसित न झाल्याने हे हब फार उभे होऊ शकले नाहीत. कालांतराने मागील १४ वर्षांत त्यात बदलही करण्यात आले. यामध्येच हेल्थ हबचादेखील समावेश होता. हा हब तेव्हा फार विकसित होऊ शकला नसला तरी आता हलक्या स्वरुपात उभा होण्याची चिन्हे इंडो-युके हेल्थ रिसर्च इन्स्टिट्युटच्या माध्यमातून निर्माण झाली आहेत.
इंडो-युके हेल्थ रिसर्च इन्स्टिट्युट ही प्रामुख्याने हेल्थ टूरिझम क्षेत्रात कार्य करते. या संस्थेने काही राज्यांशी करार करुन त्यांची केंद्रे तेथे सुरू केली आहेत. पण अलीकडेच केंद्र सरकारशी झालेल्या चर्चेतून या संस्थेने भारतात दहा इन्स्टिट्युट उभ्या करण्याचा निर्णय घेतला. यापैकी पहिली इन्स्टिट्युट ही आता मिहानमधील सेझमध्ये आणली जात आहे.
'सेझच्या नियमानुसार प्रत्येक गुंतवणूकदाराला निर्यात करणे आवश्यक असते. यामुळे ही इन्स्टिट्युट येथे येत असताना हेल्थ टूरिझमच्या माध्यमातून सेवांची निर्यात करणार आहे. यासाठी विदेशी पर्यटक येथे येतील. या संस्थेत ते उपचार घेतील. त्यानंतर पर्यटन करून परततील, अशी योजना आखण्यात आली आहे. यासाठी संस्थेच्या चमूने जागेची पाहणीदेखील केली आहे. ही फाइल आता अंतिम टप्प्यात असून ती मुख्यमंत्र्यांकडे गेली. लवकरात लवकर त्यावर निर्णय होण्याची आशा आहे', असे एमएडीसीचे मार्केटिंग व्यवस्थापक अतुल ठाकरे
यांनी सांगितले.
संस्थेला ५० टक्के सवलत !
इंडो-युके हेल्थ रिसर्च इन्स्टिट्युट ही आरोग्य क्षेत्रातील संस्था असल्याने तिला सेझमध्ये जमीन देताना सवलत देण्याबाबतही एमएडीसी विचार करीत आहे. पतंजलीला जशी स्वस्तात जमीन दिली, तशीच या संस्थेला ५० टक्के सवलतीच्या दरात (६० ऐवजी एकरी ३० लाख रुपये) दिली जाण्याची शक्यता आहे. प्राप्त माहितीनुसार, ही फाइल सध्या मुख्यमंत्र्यांचे प्रधान सचिव प्रवीण परदेसी यांच्या दालनात आहे. या पार्श्वभूमीवर 'मटा' च्या प्रतिनिधीने परदेसी यांच्याशी चर्चा केली असता, त्यांनी 'याबाबत लवकरच निर्णय घेतला जाईल. संचालक मंडळाच्या बैठकीत हा विषय मांडला जाईल,' असे स्पष्ट केले.
मोबाइल अॅप डाउनलोड करा आणि राहा अपडेट