म.टा.प्रतिनिधी, नागपूर
विद्यार्थ्यांच्या पाठीवरील ओझे उतरविण्याबाबत वारंवार सूचना देऊनही कोणतीही कारवाई न करणाऱ्या शाळांना पुन्हा एकदा कानपिचक्या देण्याची वेळ सीबीएसईवर आली आहे. विद्यार्थ्यांना शाळेत पुस्तके आणली नाहीत तरी त्यांना कोणतीही शिक्षा केली जाऊ नये. विद्यार्थ्यांच्या पाठीवरील दप्तराचे ओझे कमी करण्यासाठी शाळा, शिक्षक आणि पालक या तिन्ही घटकांना जागरुकतेने प्रयत्न करणे गरजेचे असल्याचे केंद्रीय माध्यमिक शिक्षण मंडळाने म्ह‌टले आहे.
विद्यार्थ्यांच्या पाठीवर वर्गागणिक वाढत जाणारे ओझ्याच्या विषय गेल्या काही वर्षांपासून सातत्याने च‌र्चिला जातो आहे. सीबीएसई शाळांमधील विद्यार्थ्यांचे दप्तरे अधिक जड असतात आणि त्यामागे शाळांचे अर्थकारणही दडलेले असते हे वारंवार पुढे आले आहे. अद्यापही अनेक शाळांमध्ये दप्तरओझ्याबाबत कोणतीही ठोस कारवाई करण्यात आलेली नाही. त्यामुळे, सीबीएसईने पुन्हा एकदा यासंदर्भात स्पष्ट सूचना दिल्या आहेत. वेळापत्रकानुसारच विद्यार्थ्यांनी पुस्तके आ‌णावी आणि दप्तरांमध्ये कोणतेही अतिरिक्त साहित्य असू नये, हे शाळांनी विद्यार्थ्यांना सांगावे, विद्यार्थ्यांची दप्तरे रोज तपासली जावीत, शाळेच्या कालावधीतच विद्यार्थ्यांनी अभ्यास पूर्ण करावा, दप्तराचे ओझे कमी होईल अशीच वेळापत्रकाची रचना असावी असे शाळांना सांगण्यात आले आहे.
शिक्षकांसाठीही सीबीएसईने विविध सूचना दिल्या आहेत. पुस्तके आणण्याची कोणतीही सक्ती केली जाऊ नये तसेच तंत्रज्ञानाचा वापर रोजच्या अध्यापनात करावा, असे आवाहन शिक्षकांना करण्यात आले आहे. पालकांनी हलकी दप्तरे विकत घ्यावीत, पाल्य अतिरिक्त सामग्री नेत नाही याची काळजी घ्यावी, दप्तरे रोज बघ‌ितली जावीत इत्यादी सूचना पालकांनाही देण्यात आल्या आहेत.
सूचना सीबीएसईच्या...
प्रोजेक्टशी संबंधित अभ्यास हा घरकाम म्हणून देण्यात येऊ नये आणि शाळेत ती सामूहिक क्रिया म्हणून पूर्ण करुन घेण्यात यावा.
१ ते ८ ची पुस्तके कमी वजनाची असावीत आणि जड पुस्तके आणायला सांगू नये.
पहिली आणि दुसरीच्या विद्यार्थ्यांना होमवर्कच असू नये.
विद्यार्थ्यांचे गट करुन त्यांना पाठ्यपुस्तके एकत्रितपणे वापरण्याची सूट देण्यात यावी.
लटकणारी, वजनी दप्तरे घेऊ नये.
मोबाइल अॅप डाउनलोड करा आणि राहा अपडेट