अवघ्या महाराष्ट्राला आपल्या गीत व संगीताने ‘येड’ लावणाऱ्या अजय-अतुल यांनी वेरुळ-अजिंठा आंतरराष्ट्रीय महोत्सवासाठी आलेल्या रसिकश्रोत्यांना ‘येडे’ ठरवले. ‘लाइव्ह इन कॉन्सर्ट’ कार्यक्रमात आपण लाइव्ह गातोय, असा आव आणत त्यांनी चक्क गाण्याचा अभिनय केला. अचानक साउंड ट्रॅक बंद पडल्यामुळे अजय-अतुल यांचे पितळ उघडे पडले. अजय-अतुल यांच्यासारख्या नावाजलेल्या गायकांनी केलेल्या या प्रकारामुळे रसिकश्रोत्यांची फसवणूक झाल्याची भावना नागपुरातील गायक, वादक, साऊंड क्षेत्रातील कलावंतांनी व्यक्त केली आहे. ‘रसिकांनी त्यांच्या प्रेमापोटी महागडे तिकीट काढून जायचे, अन् त्यांनी रसिकांसोबतच स्वतःच्या कलेशीही गद्दारी करावी, असा हा प्रकार आहे’, असा रोष नागपूरकरांनी व्यक्त केला.
शुद्ध फसवणूक
ट्रॅकवर गायन-वादन सुरू असेल आणि गायक केवळ अभिनय करत असेल तर त्याला प्लस वन ट्रॅक म्हणतात. मोठ्या कॉन्सर्टमध्ये कलाकार प्लस वन ट्रॅकवर गाताना दिसतात. दिसायला लाइव्ह पण गायक व वादकांनी केवळ अभिनय करण्याचा हा प्रकार म्हणजे रसिकांची फसवणूकच असतो. प्लस वन ट्रॅकवरील गाण्यामुळे वादकांना वादनांची संधीच मिळत नाही. त्यामुळे वादकांचा त्याला नेहमीच विरोध राहिला आहे. फार मेहनत करावी लागू नये म्हणून कलाकारांनी ट्रॅकवर गाण्याचा हा ट्रेंड वाढत असून त्यामुळे वादकांच्या रोजीरोटीचा प्रश्न उपस्थित होऊ लागला आहे.
- सचिन ढोमणे, तबलावादक
गायकांना खात्री नसते
आताशा गाणी कम्प्युटर सॉफ्टवेअरच्या मदतीने तयार केली जातात. त्यात जे साउंड क्रिएट केले जातात, ते वाद्यांवर वादकांना वाजवण्याच्या मर्यादा पडतात. शिवाय, एकदा गायलेले गाणे सॉफ्टवेअरच्या मदतीने फाइन केले जाते. लाइव्ह परफॉर्मन्समध्ये तसे गाणे सादर होईलच, याची गायकांना खात्री नसते. त्यामुळे ते ट्रॅकवर गातात. गायक प्लस वन ट्रॅकवर अभिनय करतात आणि वादकांनाही अभिनय करायला सांगतात. पण ते आमचे काम नाही. त्यामुळे वादक ट्रॅकच्या विरोधात आहेत. रसिक महागाच्या तिकीट काढून कार्यक्रमाला येत असतात. त्यामुळे गायकांनी असे करणे चुकीचेच आहे.
- गौरव टांकसाळे, गिटारवादक
तसे करावेच लागते
आताची तयार झालेली गाणी लाइव्ह परफॉर्म करायला फार अवघड असतात. कारण गायकाचा आवाज, वाद्य यांवर कम्प्युटर सॉफ्टवेअरच्या मदतीने बरेच संस्कार केले जातात. आपण रेकार्ड केलेले जे गाणे ऐकतो ते खूपच फाइन असते. तसेच गाणे लाइव्ह परफॉर्म करणे वादकांना आणि कलाकारांनाही शक्य नसते. त्यामुळे मोठे कलाकार लाइव्ह कॉन्सर्टमध्ये ट्रॅकवर गातात. त्यात काही गैर आहे असे वाटत नाही. लाइव्ह गाणे जसेच्या तसे उतरले नाही तर कलाकारांना इमेज खराब होण्याची भीती असते. चित्रपटातही कलाकार डायलॉगवर लिपसिंक करतातच की. मग यात काय चुकीचे आहे.
- पवन मानवटकर, सिंथेसायजर वादक
समाधान मिळत नाही
लाइव्ह कार्यक्रमांमध्ये श्रोत्यांसमोर गाणे सादर करण्याची मजाच काही और असते. श्रोत्यांकडून मिळणाऱ्या प्रतिसादामुळे गाणे गायल्याचे समाधान, आनंद मिळत असतो. तो आनंद, ते समाधान ट्रॅकवर गाणे सादर केल्याने मिळत नाही. श्रोते गायकाची प्रतिभा बघायला भरपूर पैसे मोजून आलेले असतात. ट्रॅकवरचेच गाणे ऐकायचे तर ते घरी बसून रेकॉर्ड ऐकू शकतात. पण लाइव्ह कार्यक्रमाचा अंदाज वेगळा असतो. सुरेश वाडकर, भूपेंद्रसिंग यांच्यासारखे गायक अजूनही लाइव्ह गातात. सुखविंदरसिंगच्या कार्यक्रमात आम्ही कोरसमध्ये गात होतो. पण नंतर लक्षात आले की ट्रॅक सुरू आहे. शेवटी आम्हाला सुखविंदरसिंगसोबत उभे राहता आले, यावरच समाधान मानावे लागले.
- सागर मधुमटके, गायक
मोबाइल अॅप डाउनलोड करा आणि राहा अपडेट