मेडिकलशी संलग्न सुपर स्पेशालिटी हॉस्पिटलच्या जीव रसायनशास्त्र विभागात रक्ताचे नमुने अस्ताव्यस्त पडून असल्याची घटना ताजी असतानाच मेडिकलच्या रक्तपेढीतही रक्ताचे नमुने अस्ताव्यस्त असल्याचा प्रकार पुढे आला आहे.
कोणत्याही आजाराचे अचूक निदान करण्यासाठी रुग्णाला डॉक्‍टरकडून काही चाचण्या सांगितल्या जातात. यात रक्त, मलमूत्र तपासणीच्या अनेक चाचण्या असतात. उपचाराची दिशा ठरविताना या चाचण्या मोलाच्या ठरतात. अलीकडे वैद्यकशास्त्रात चाचण्याच महत्त्वाच्या मानल्या जातात. त्यामुळे रक्तासह इतरही तपासणी करणारी यंत्रणा संवेदनशील असायला हवी. मात्र, त्यालाच हरताळ फासला जात असल्याचे मेडिकलच्या रक्तपेढीत दिसून आले.
चाचणीसाठी घेतलेले रक्त व इतर नमुने रुग्णांच्या कार्डवर अशाप्रकारे ठेवले जातात. चक्क उघड्यावर हे नमुने पडून असल्याचे दिसतात. तंत्रज्ञ कर्मचारी किंवा या विभागीतील सफाई कामगारांच्या हाती रुग्णाचे नातेवाईक नमुने देतात. नमुने स्वीकारल्यानंतर अशाप्रकारे ठेवले जातात. बराच वेळ नमुने तसेच पडून राहतात. मेडिकलचे बाह्यरुग्ण विभागाचे वेळापत्रक सकाळी ८ वाजतापासून सुरू होते. दुपारी २ वाजेपर्यंत नमुने येतात. दिवसभराचे नमुने स्वीकारल्यानंतर रक्तपेढीत हे नमुने आणले जातात. यात रक्त व लघवीचे नमुने असे टेबलावर ठेवले जातात. मनुष्यबळाची आधीच चणचण असल्याने त्याच्या देखरेखीसाठी कोणीच राहत नाही. अशावेळी कुणाला गैरकृत्य करायचे असेल तर त्याच्यासाठी जणू रान मोकळे आहे, अशी परिस्थिती आहे.
दर दिवसाला दीडशेवर नमुने
मेडिकलच्या पॅथालॉजी विभागात रक्ततपासणीसाठी प्रचंड गर्दी असते. दोन दिवसांपूर्वी एका रुग्णाने लहानशा बॉटलमध्ये रक्ताचे नमुने आणले. टेबलवर ठेवला असता कागद हवेच्या झुळकीने कागद उडाला. बॉटल टेबलवर राहिली. कागदाची शोधाशोध सुरू झाली. असे अनेकवेळा घडते. यामुळे रक्ताच्या नमुन्यांचा अहवाल बदलण्याची शक्‍यता असते, असे सांगण्यात आले. दर दिवसाला मेडिकलमध्ये दीडशेवर रक्ताचे नमुने तपासले जातात.
मोबाइल अॅप डाउनलोड करा आणि राहा अपडेट