संपूर्ण देशात खळबळ उडविणाऱ्या अडीच हजार कोटींपेक्षा अधिकच्या डब्बा ट्रेडिंग प्रकरणाच्या तपासासाठी एसआयटीची (विशेष तपास पथक) स्थापना करण्यात आली आहे. या पथकाचे प्रमुख गुन्हेशाखेचे वरिष्ठ पोलिस निरीक्षक रवींद्र पाटील राहतील, अशी माहिती पोलिस सहआयुक्त राजवर्धन सिन्हा यांनी दिली. सिव्हिल लाइन्समधील गुन्हे शाखेच्या कार्यालयात बुधवारी ते पत्रकारांशी बोलत होते.
बुधवारी त्यांनी या प्रकरणाच्या तपासाचा आढावा घेतला. त्यानंतर पोलिस आयुक्त एस. पी. यादव यांच्या मार्गदर्शनाखाली एसआयटीची स्थापना केली. अंमलबजावणी संचालनालय व आयकर विभागालाही या प्रकरणाची माहिती देण्यात आली आहे. गुन्हेशाखेचे प्रभारी अतिरिक्त पोलिस आयुक्त रंजनकुमार शर्मा व उपायुक्त दीपाली मासिरकर यांना रवींद्र पाटील हे तपासाच्या प्रगतीबाबत 'डे टू डे' माहिती देतील. याप्रकरणाच्या तपासासाठी लेखापाल, वकील व शेअर ब्रोकरचीही मदत घेण्यात येणार आहे.
आर्थिक घोटाळा असल्याने या प्रकरणाच्या तपासाला वेळ लागतो. त्यामुळे एसआयटीच्या तपासाचा कालावधी निश्चित करता येत नाही, असेही राजवर्धन यांनी एका प्रश्नाच्या उत्तरात सांगितले.
या प्रकरणात १३ जणांना अटक करण्यात आली आहे. फरार आरोपींचा शोध सुरू आहे. महाराष्ट्र पोलिस व त्यातही नागपूर पोलिस प्रत्येक प्रकरणाचा तपास करण्यास सक्षम आहे. त्यामुळे या प्रकरणाचा तपास सीबीआयकडे सोपविण्याचा प्रश्नच येत नाही. तसेही सीबीआयकडे तपास सोपविण्याचा अधिकार सरकारचा असतो. पत्रपरिषदेला गुन्हे शाखेचे प्रभारी अतिरिक्त आयुक्त रंजनकुमार शर्मा, उपायुक्त दीपाली मासिरकर व एसआयटीचे तपास अधिकारी रवींद्र पाटील उपस्थित होते.
आरोपींची बँक खाती गोठवणार याप्रकरणातील आरोपींच्या आर्थिक व्यवहाराची माहिती घेण्यात येत आहे. आरोपींच्या बँक खात्याचीही माहिती काढण्यात येत आहे. माहिती मिळाल्यानंतर त्यांचे बँक खाती गोठवण्याची प्रक्रिया करण्यात येईल. आवश्यकतेनुसार सेबीच्या अधिकाऱ्यांचीही मदत घेण्यात येत आहे.
नेत्यांच्या समावेशाबाबत सध्याच सांगता येणार नाही याप्रकरणात राजकीय नेत्यांचा समावेश आहे किंवा नाही हे संपूर्ण आरोपींच्या अटकेनंतर व तपासानंतरच सांगता येईल. सध्या काही सांगणे घाईचे होईल. डब्बा ट्रेडिंगमध्ये अवैध व्यवसाय करणाऱ्यांचा समावेश आहे. काळा पैसा चलनात आणत असल्याचीही अधिक शक्यता आहे, असे पोलिस सहआयुक्त म्हणाले.
मोबाइल अॅप डाउनलोड करा आणि राहा अपडेट