रुळावरून गाडीचे डबे घसरण्याचा प्रकार अनेकदा घडतो, मात्र वेगात असलेल्या गाडीच्या गार्डचा डबा अचानक गाडीपासून वेगळा होतो आणि बाकीची गाडी धडधडत पुढे निघून जाते, असा प्रकार सहसा होत नाही. पण नागपूर- मुंबई दुरांतो एक्स्प्रेसच्या बाबतीत चार दिवसांपूर्वी हा धक्कादायक प्रकार घडल्याने खळबळ उडाली आहे.
सूत्रांनी दिलेल्या माहितीनुसार मंगळवारी ३ मे रोजी नागपूर- मुंबई दुरांतो एक्स्प्रेस रात्री ८.४० वाजता नागपूर स्थानकावरील होम प्लॅटफॉर्मवरून सुटली. त्यानंतर २० ते २५ मिनिटांतच खापरी स्थानकाच्या आधी अचानक गाडीला मोठा धक्का बसला आणि गार्डचा डबाच वेगळा झाला. गार्डने डब्यातून वाकून पाहिले तेव्हा गाडी वेगात पुढे जात असलेली आणि आपला डबा हळूहळू गाडीच्या मागे धावत असल्याचे पाहून त्यालाही धक्काच बसला. हा प्रकार घडला त्यावेळी गाडीतील प्रवाशांनाही जोरदार झटका बसला. मात्र, काय झाले कुणालाच कळत नव्हते.
दरम्यान, सारी परिस्थिती लक्षात येताच लगेच गार्डने लोको पायलटला वॉकीटॉकीवर आपला डबा वेगळा झाल्याची माहिती दिली आणि जवळपास २ कि.मी. पुढे जाऊन ही गाडी थांबली. आता गार्डचा डबा जोडायचा तर तो डबा गाडीपर्यंत ढकलत नेणे शक्य नव्हते. त्यामुळे गाडीच मागे आणणे भाग होते. शेवटी दुरांतो एक्स्प्रेस रिव्हर्स निघाली. काही वेळापूर्वी बसलेला झटका, त्यानंतर गाडीचे मागे जाणे यामुळे चर्चा, शंकांना ऊत आला होत. शेवटी गार्डच्या डब्याजवळ गाडी जाऊन थांबताच अनेक प्रवासी खाली उतरून नेमके काय झाले पाहू लागले. तेथे गार्डचा डबा गाडीला पुन्हा जोडण्यात आला आणि साधारण २०-२५ मिनिटांनी ही गाडी पुढे रवाना झाली.
सुरक्षेवर प्रश्नचिन्ह या सर्व प्रकारामुळे प्रवाशांच्या सुरक्षेवरच प्रश्नचिन्ह लागले आहे. धावत्या गाडीत दोन डब्यांचे कपलिंग निघत असेल तर ही गंभीर बाब आहे. त्यामुळे या सर्व प्रकाराची गंभीर दखल रेल्वे प्रशासनाने घ्यावी, अशी मागणी प्रवाशांनी केली आहे.
प्रशासनाकडून दखल रेल्वेचे कपलिंग तुटून एक डबा मागे सुटतो आणि ही बाब लक्षातही येत नाही, याची गंभीर दखल रेल्वे प्रशासनाने घेतली आहे. हे नेमके घडले कसे, याबाबत चौकशी सुरू झाली असल्याचे रेल्वेच्या जबाबदार सूत्रांनी सांगितले. शिवाय, स्थानकावरून निघताना प्रत्येक रेल्वेची नीट तपासणी करण्यात यावी, अशाही सूचना वरिष्ठ पातळीवरून देण्यात आल्या असल्याची माहिती आहे. सायंकाळी उशिरापर्यंत याबाबत चौकशी व विचारविमर्श सुरू होता, असे कळले.
मोबाइल अॅप डाउनलोड करा आणि राहा अपडेट