पंकज मोहरीर, चंद्रपूर
राष्ट्रीय व आंतरराष्ट्रीय पर्यटकांच्या जंगल सफारीसाठी प्रख्यात असणारा ताडोबा-अंधारी व्याघ्रप्रकल्प हा राज्यात पुन्हा एकदा अव्वल ठरला आहे. ताडोबात उन्हाळ्यात ४४ हजार २०५ पर्यटकांची हजेरी लावल्याची अधिकृत माहिती समोर आली आहे. दरम्यान, एरवी मंगळवारी बंद राहणारा ताडोबा-अंधारी व्याघ्र प्रकल्प आता बंद राहणार नाही. शुक्रवारपासून पर्यटकांना रोजच सफारी करता येणार आहे. पण पावसाळ्यामुळे ताडोबा प्रकल्प हा या कालावधीत अंशतः सुरू राहणार आहे.
शक्ती आणि सौंदर्याचे प्रतीक असलेल्या वाघांच्या मुक्त संचारामुळे ताडोबाला राष्ट्रीयच नव्हे तर आंतरराष्ट्रीयस्तरावर महत्त्वाचे स्थान आहे. या प्रकल्पात वाघांशिवाय बिबट, गवा, सांबर, चितळ, रानडुक्कर हे प्राणी प्रामुख्याने आढळतात. महाराष्ट्राचे रत्न म्हणून ओळख असणाऱ्या ताडोबा अंधारी व्याघ्र प्रकल्पाचे वेगळेपण हा एक मौलिक ठेवा आहे. ऐतिहासिक वारसा लाभलेल्या या ताडोबातील मनाला भुरळ पाडणाऱ्या सौंदर्याने इंग्रजांनाही प्रेमात पाडले होते. ताडोबा-अंधारी व्याघ्र प्रकल्पात आंतरराष्ट्रीय पर्यटकाचा ओघ वाढविण्यासाठी महाराष्ट्र पर्यटन विकास महामंडळाने देखील हातभार लावत वेगवेगळे प्रयोग केले. राज्यात सर्वाधिक वाघांची नोंद ताडोब्यात आहे. त्यामुळे पर्यटकांची पहिली पसंती व्याघ्र पर्यटनात ताडोबालाच असते. त्याचा प्रत्यय पुन्हा एकदा आला आहे. यंदा विदर्भातील उन्हाळा तापदायक ठरला असला तरी ताडोबाला त्याचा फटका बसला नाही. उलट मे महिनाभर येथे पर्यटकांची गर्दी मोठ्या प्रमाणावर दिसून आली. १ मार्च २०१६ ते ३१ मे २०१६ या तीन महिन्यांच्या कालावधीत ताडोब्यात तब्बल ४४ हजार २०५ पर्यटकांनी हजेरी लावली. त्यात सर्वाधिक पर्यटक मे महिन्यात येऊन गेलेत. हा प्रतिसाद बघता तसेच रोजची गर्दी कमी करण्यासाठी एरवी मंगळवारी बंद राहणारा ताडोबा-अंधारी व्याघ्र प्रकल्प आता बंद राहणार नसून आता पर्यटकांना रोजच सफारी करता येणार आहे. अर्थात ताडोबाची प्रतिसाद व प्रकल्पातील पर्यटकांचा भार बघून रोजची सफारी कायमस्वरूपीच राहीलच असे नाही, असे नसल्याचे सुत्रांनी स्पष्ट केले.
ऑनलाइन बुकिंग सुरू शुक्रवारपासून मोहुर्ली कोलारा, नवेगाव व खुटवंडा या चार प्रवेशद्वारातून पर्यटकांना प्रवेश देण्यासाठी ऑनलाइन बुकींग सुरू झाले आहे. १५ ऑक्टोबरपर्यंत ही प्रक्रिया राहणार आहे. सलग सव्वा तीन महिन्यांनंतर १६ ऑक्टोबरला प्रकल्प पूर्णतः खुला होईल असे वरिष्ठ सुत्रांनी स्पष्ट केले. ही ऑनलाइन बुकिंग सेवा सुरू करण्यात आली असून त्याचा लाभ पर्यटक घेत आहेत.
प्रकल्प अंशतः सुरू दरम्यान पावसाळ्यात देशभरातील बहुतांश व्याघ्र प्रकल्प बंद असतात. मागील काही वर्षांपासून ताडोबाही प्रकल्प या कालावधीत अंशतः सुरू असतो. मात्र यंदा पर्यटकांसाठी यंदा आनंदाची बातमी आहे. प्रथमच संपूर्ण पावसाळ्यात ताडोबाचे ऑनलाइन बुकिंग सुरू राहणार असून पर्यटकांना मान्सून पर्यटनाचा आनंद घेता येणार आहे. या कालवधीत ताडोबा-अंधारी व्याघ्र प्रकल्पाचे चार प्रवेशद्वारातून पर्यटकांना प्रवेश मिळणार असून दिवसभरात दोन्ही फेरीतील वाहनांचा कोटा ५२ वर आणण्यात आला आहे. मात्र त्यास जास्त प्रतिसाद नसल्याचे दिसून आले आहे. ताडोबा-अंधारी व्याघ्र प्रकल्पाचे एकूण सहापैकी झरी, पांगडी हे दोन प्रवेशद्वार बंद ठेवण्यात येणार असून मोहुर्ली कोलारा, नवेगाव व खुटवंडा या चार प्रवेशव्दारातून पर्यटकांना प्रवेश देण्यात येणार आहे. पावसाळ्यामुळे मोहर्ली-नवेगाव, खुटवंडा-खातोडा, कोलारा-जामनीचौक-ताडोबा यासह काही मर्यादीतच रस्ते सुरू राहतील, तर उर्वरित रस्ते बंद राहणार आहेत.
तीन महिन्यातील पर्यटक मार्च - १३ हजार ०६ एप्रिल - १३ हजार ८२६ मे - १७ हजार ३७३
मोबाइल अॅप डाउनलोड करा आणि राहा अपडेट