म. टा. प्रतिनिधी, यवतमाळ
स्थानिक यवतमाळ पब्लिक स्कूल (वायपीएस)मधील मुलींवर दोन शिक्षकांनी लैंगिक अत्याचार केल्याचे तीव्र पडसाद गुरुवारीही उमटले. यवतमाळवासीयांनी कडकडीत बंद पळला. मोर्चाही निघाला. या निषेध आंदोलनामुळे शहरात काही काळ तणावाचे वातावरण होते. दरम्यान, याप्रकरणी पोलिसांनी शाळा व्यवस्थापन समितीविरुद्ध हलगर्जीपणाचा गुन्हा नोंदविला आहे. आरोपी शिक्षकांना पोलिस कोठडी सुनावण्यात आली आहे.
वायपीएस ही माजी खासदार विजय दर्डा यांची ही शाळा आहे. गुरुवारी सकाळपासूनच विद्यार्थिनींवरील लैंगिक अत्याचाराच्या निषेधार्थ बाजारपेठ बंद होती. सकाळी दहाच्या सुमारास दत्त चौकात संतप्त यवतमाळकर जमा होऊ लागले. यात महिलांची संख्या अधिक होती. त्यानंतर येथे जमलेल्या नागरिकांनी मोर्चा काढला. एलआयसी चौकाकडे मार्गक्रमण केले. शहरातील वेगवेगळ्या भागातून नागरिक मोर्चाने जिल्हाधिकारी कार्यालयापर्यंत पोहोचले. खबरदारीचा उपाय म्हणून पोलिसांनी चौकात मोर्चा अडविला. यावेळी नागरिकांनी शाळा प्रशासनाच्या विरोधात घोषणाबाजी केली. त्यानंतर नागरिकांच्या शिष्टमंडळाने जिल्हाधिकारी सचिंद्र प्रताप सिंह व पोलिस अधीक्षक अखिलेशकुमार सिंग यांची भेट घेतली. त्यांना निवेदनही देण्यात आले. आरोपी शिक्षकांसह शाळा व्यवस्थापनावरही कठोर कारवाई करण्यात यावी, अशी मागणी यावेळी करण्यात आली. अशी मागणीही निवेदनात करण्यात आली आहे.
आरोपींना कोठडी संतप्त पालकांनी शाळेतून आपल्या पाल्यांची नावे काढण्यासाठी वायपीएसपुढे गर्दी केली. पालकांना तिथे शाळा तीन दिवस बंद राहणार असल्याचा फलक दिसला. त्यामुळेही काही काळ तणाव निर्माण झाला होता. दरम्यान, शाळेचे सचिव किशोर दर्डा यांच्या घराबाहेरदेखील पोलिसांनी कडेकोट बंदोबस्त तैनात केला होता.
शाळा तीन दिवस बंद विद्यार्थिनींचे शोषण करणारे आरोपी यश बोरुंदिया व अमोल क्षीरसागर यांना पोलिसांनी गुरुवारी कोर्टासमक्ष उभे केले. त्यांना ४ जुलैपर्यंत पोलिस कोठडीत ठेवण्याचे आदेश कोर्टाने दिले. आरोपींच्या पेशीदरम्यान कोर्टाच्या परिसरातदेखील गर्दी होती. कुठलीही अप्रिय घटना घडू नये म्हणून येथे बंदोबस्त वाढविण्यात आला होता.
वायपीएसमधील लैंगिक प्रकरणाची माहिती मुख्यमंत्र्यांना दिली आहे. या प्रकरणाचा सखोल तपास केला जाईल. आरोपी कोणीही असो, त्याची गय केली जाणार नाही. - संजय राठोड, पालकमंत्री
मोबाइल अॅप डाउनलोड करा आणि राहा अपडेट