एसी नादुरुस्त असल्याने गोंधळ घालणाऱ्या राप्तीसागर एक्स्प्रेसच्या प्रवाशांची एसी दुरुस्त करण्याची किंवा बोगी बदलून देण्याची मागणी पूर्ण झालीच नाही फक्त एसी दुरुस्त करणारे दोन कर्मचारी सोबत देऊन त्यांची बोळवण करण्यात आली. नागपूर स्थानकावर सोमवारी सायंकाळी हा प्रकार घडला. या गोंधळामुळे या गाडीला १ तास १० मिनिटे उशीर झाला.
तिकिटाचे पैसे पूर्ण घ्यायचे पण सुविधा पुरवायच्या नाही, या प्रकारामुळे हे प्रवासी संतप्त झाले होते. १२५१२ तिरुअनंतपुरम-गोरखपूर राप्तीसागर एक्स्प्रेस ही गाडी सोमवारी सायंकाळी १७.०५ वाजता नागपूर स्थानकावर प्लॅटफॉर्म क्र. १ वर आली. ही गाडी तिरुअनंतपुरमवरून निघाली तेव्हापासूनच बी-टू कोचमधील एसी काम करीत नव्हता. त्यामुळे प्रवाशांनी या प्रकाराची टीसीकडे तक्रार केली. मात्र, प्रत्येक स्थानकावर पुढील स्थानकावर एसी दुरुस्त करून देण्याचे आश्वासन घेऊन गाडी पुढे जात राहिली. एसी कोच असल्याने काचा बंद आणि त्यात एसी बंद, त्यामुळे प्रवाशांना श्वास घेणे कठीण जात होते. दरम्यान गाडी सुटल्यापासून ३९ स्थानके येऊन गेली, पण एसी काही दुरुस्त झाला नाही. त्यामुळे आता नागपूर स्थानकावर ही बोगीच बदलण्याची मागणी लावून धरायची, असा प्रवाशांनी निर्धार केला होता.
दरम्यान प्रवाशांचा हा पवित्रा रेल्वे नियंत्रण कक्षाला कळला होता. त्यामुळे ही गाडी नागपुरात येण्यापूर्वीच लोहमार्ग आणि आरपीएफचे जवान प्लॅटफॉर्मवर सज्ज होते. १७.०५ ला गाडी आल्यानंतर दहा मिनिटांनी ती निघायला हवी होती. मात्र, एसीवरून झालेल्या गोंधळाने अखेर १८.०० वाजता गाडी सुटली झाली. पण लगेच चेन पुलिंग करून गाडी थांबविण्यात आली. आधी आमची बोगी बदलून द्या, मगच गाडी पुढे जाऊ देऊ, असे प्रवाशांचे म्हणणे होते. स्टेशन व्यवस्थापक, वाणिज्य विभागाचे अधिकारी यांनीही रेल्वे स्थानकावर धाव घेतली. त्यांनी प्रवाशांची समजूत घालण्याचा प्रयत्न केला. पण उपयोग होत नव्हता. या गोंधळात पुढे निघालेली गाडी तब्बल दहादा चेन पुलिंग करून थांबविण्यात आली. शेवटी एसी दुरुस्त करणारे दोन कर्मचारी आणि त्यांच्या सुरक्षेसाठी आरपीएफचे जवान देऊन ही गाडी पुढे रवाना करण्यात आली. या साऱ्या गोंधळामुळे या गाडीला १ तास १० मिनिटे उशीर झाला.
मोबाइल अॅप डाउनलोड करा आणि राहा अपडेट