खासगी आणि साखळी रुग्णालयांशी संलग्न औषधांच्या दुकानासंबंधी अन्न व औषध प्रशासनाने अलिकडेच रुग्णालयांना नोटीस पाठविली. या रुग्णालयाशी संलग्न औषधालयासमोर रुग्णांना बाहेरूनही औषध खरेदी करता येईल, असे सूचना फलक दर्शनी भागात लावणे सक्तीचे करण्यात आले आहे. मात्र यातून बनावट औषधे रुग्णांपर्यंत पोहचण्याचा धोका लक्षात घेता या सक्तिवर हॉस्पिटल असोसिएशन कायदेशीर सल्लामसलत करणार आहे. सोबतच या मुद्यावरून असोसिएशनचे शिष्टमंडळ पुढील आठवड्यात एफडीएच्या अधिकाऱ्यांशीही चर्चा करणार आहेत.
हॉस्पिटल असोसिएशनतर्फे या मुद्यावरून ऑरेंज सिटी हॉस्पिटलमध्ये मंगळवारी बैठक घेण्यात आली. त्यात हा निर्णय घेण्यात आला. असोसिएशनचे अध्यक्ष डॉ. उदय माहोरकर, सचिव डॉ. अनुप मरार यांच्यासह सर्व पदाधिकारी उपस्थित होते. या मुद्यावरून लवकरच असोसिएशन ज्येष्ठ कायदेतज्ज्ञ अॅड. श्रीरंग भांडारकर यांचे मत विचारात घेण्याचा निर्णय बहुमताने घेण्यात आला. एका बाजुला बाजार विक्री होणाऱ्या एकूण औषधांपैकी ३० टक्के औषधे बनावट असल्याचे अन्न व औषध प्रशासन मान्य करते. तर दुसरीकडे रुग्णालयांशी संलग्न औषधाच्या दुकानातून औषध विक्रीला एफडीए विरोध करीत आहे. त्यामुळे या माध्यमातून बनावट औषधे रुग्णांपर्यंत पोहचण्याचा धोका असतो. रुग्णहित लक्षात घेता हॉस्पिटल असोसिएशनचा त्याला विरोध आहे. शिवाय रुग्णालयांशी संलग्न औषध दुकानातून मिळणारी औषधे जादा दरात रुग्णांना विकली जातात. त्या तुलनेत रुग्णालयाच्या बाहेरून औषधे स्वस्त मिळतात. मात्र रुग्णालयांशी संलग्न औषधालयांमधून विक्री दरापेक्षा जास्त दराने विकली जात नाहीत. या तक्रारीत तथ्य नाही. औषधांचा दर्जा आणि बनावट औषधांच्या विक्रीवर अन्न व औषध प्रशासनाकडेच ठोस असे नियम नाही. त्यात रुग्णलयांमध्ये कार्यरत औषध दुकानासमोर बाहेरून औषध विकत घेऊ शकता, असा सूचना फलक अन्न व औषध प्रशासन कोणत्या आधारावर सक्ती करीत आहे, यावरही कायदेशीर सल्लामसलत असोसिएशन घेणार असल्याचे सूत्रांनी सांगितले.
या वेळी असोसिएशनचे कोषाध्यक्ष डॉ. समीर पलटेवार, डॉ. दीपक देशमुख, डॉ. के. सुजाथा, डॉ. अविनाश पोफळी, डॉ. प्रमोद मुंधडा, डॉ. राजन बारोकर, डॉ. शांतनू सेनगुप्ता, समन्वयक डॉ. प्रकाश खेतान, डॉ. उषा नायर, डॉ. आलोक उमरे आदी उपस्थित होते.
मोबाइल अॅप डाउनलोड करा आणि राहा अपडेट