उपराजधानीच्या विकासाला गती देणाऱ्या नागपूर मेट्रोरेल्वेच्या प्रकल्पाला विश्वेश्वरैय्या राष्ट्रीय तंत्रज्ञान संस्था बॅकबोन ठरते आहे. येथील सिव्हिल, इलेक्ट्रिकल आणि स्ट्रक्चरल विभाग विविध उड्डाणपूल आणि मेट्रोच्या इतर कामांसाठी प्रमुख सल्लागार म्हणून काम करीत आहे. त्यामुळे नागपुरी मेट्रोला व्हीएनआयटीचे ब्रेन उपयोगात येत आहे.
राष्ट्रीय तंत्रज्ञान संस्थांनी निव्वळ उच्चशिक्षण देऊ नये, तर स्थानिक विकास प्रक्रियेत प्रत्यक्ष सहभागी होणे अपेक्षित आहे. त्यादृष्टीने व्हीएनआयटीने आता नागपूर मेट्रोरेल्वेच्या प्रकल्पात सहभागी होऊन त्यांच्या स्थापनेचा उद्देश पूर्णत्वास नेत आहेत.
व्हीएनआयटीच्या गव्हर्निंग बॉडीचे अध्यक्ष विश्राम जामदार यांच्याशी संपर्क साधला असता ते म्हणाले, नागपूर मेट्रोरेल्वेच्या बांधकामातील स्ट्रक्चरल सल्लागार म्हणून व्हीएनआयटी काम करीत आहे तसेच बांधकामासाठी वापरण्यात येणाऱ्या मटेरियलचे टेस्टिंग, सॉइल टेस्टिंगची कामेही व्हीएनआयटीतील प्रयोगशाळांमध्ये होत आहे. येथील प्रयोगशळांमध्ये असणाऱ्या आधुनिक उपकरणांचा लाभ मेट्रोरेल्वेही घेता येत आहे.
याशिवाय नागपूर मेट्रोरेल्वेच्या पाच उड्डाणपुलांच्या डिझाइन तयार करण्यातही व्हीएनआयटीतील तज्ज्ञांनी सहभाग घेतला आहे. त्या उड्डाणपुलांचे डिझाइनही येथे मंजूर करण्यात आले आहेत तसेच मेट्रो डेपो ते विमानतळ या पाच किलोमीटर लांबीचा जमिनीवरील मेट्रो मार्गाच्या कामातदेखील व्हीएनआयटीतील सिव्हिल इंजिनीअरिंग विभागाचे विद्यार्थी सहभागी होत आहेत, अशी माहिती विश्राम जामदार यांनी दिली.
त्यासंदर्भात नागपूर मेट्रोरेल्वेचे जनसंपर्क अधिकारी शिरीष आपटे यांच्याशी संपर्क साधला असता ते म्हणाले, व्हीएनआयटी ही शहरातील अत्यंत नामवंत संस्था असून त्यांच्याकडे कुशल मनुष्यबळासोबतच तंत्रज्ञान कौशल्यही आहे. त्यामुळे नागपूर मेट्रोरेल्वेने त्यांचे तांत्रिक सहकार्य घेतले आहे. विशेषत: वर्धा रोड आणि कडबी चौक ते ऑटोमोटीव्ही या दोन उड्डाणपुलांच्या डिझाइनमध्ये व्हीएनआयटीची मदत झाली. त्याशिवाय अन्य तीन उड्डणपुलांबाबतही त्यांनी सहकार्य केले. तर जमिनीवरील रेल्वेमार्गाच्या बांधकामसाठी सिव्हिल इंजिनीअरिंगच्या पाच मुलांना घेण्यात आले आहे. त्याशिवाय कम्प्युटर सायन्स, इलेक्ट्रॉनिक्स आणि इलेक्ट्रीकल यासारख्या विभागातील १९ मुलांनाही घेण्यात आले आहे. भविष्यातही व्हीएनआयटी, आयआयएम, आयआयटीमधील कौशल्याचा नागपूर मेट्रोला फायदा होणार असल्याचे आपटे यांनी नमूद केले.
मोबाइल अॅप डाउनलोड करा आणि राहा अपडेट