शहरातल्या बहुतांश वस्त्यांमध्ये डासांचा उच्छाद वाढला आहे. त्यामुळे साथीच्या आजारांनी देखील मुक्काम ठोकला आहे. त्यामुळे घरोघरी तापेने फणफणलेले रुग्ण आढळून येत आहेत. प्रतापनगर, छत्रपतीनगर, नरेंद्रनगर यांसारख्या पॉश रहिवासी वसाहतींमध्येही डासांची उत्पत्ती वाढली आहे. या भागात सध्या चिकनगुनिया आजाराने थैमान घातले आहे. घरोघरी किमान एकाने खाट धरल्याने ऐन दिवाळीच्या माहोलमध्ये आनंदावर विरजण पडल्याची स्थिती होती.
छत्रपतीनगर, नरेंद्रनगर, रामदासपेठ, धरमपेठेतही चिकनगुनियाचे संशयित रुग्ण आढळून येत आहेत. चिकनगुनियापाठोपाठ सणासुदीत डेंग्यूनेदेखील शहरात ठाण मांडले आहे. नरेंद्रनगरातल्या काही वसाहतींमध्ये कुटुंबातल्या सर्व व्यक्तींना कुठला ना कुठला आजार जडल्याने हा भाग आजाराचे माहेरघर झाला आहे.
महापालिकेच्या आरोग्य विभागातल्या नोंदीनुसार, ऐन दिवाळी सणात ३० डेंग्यू संशयितांच्या चाचण्या पॉझिटिव्ह आल्या आहेत. गेल्या महिन्यात हाच आकडा ४६ पर्यंत गेला होता. शहरात मलेरियाच्या चाचणीतही चार जण दोषी आढळले आहेत. तर हत्तीपाय रोगाचे दोन रुग्ण आढळून आले आहेत. त्यामुळे ऐन सणासुदीच्या दिवसाच आजारांनी थैमान घातल्याने चिंतेचे वातावरण निर्माण झाले आहे.
खबरदारीचे उपाय...
-पाणी साठविण्याची भांडी आठवड्यातून एकदा कोरडी करा.
-पाणी शक्यतो साठवू नका, साठवलेच तर झाकून ठेवा.
-घराभोवतालचा परिसर स्वच्छ, कोरडा ठेवा.
-वापरात नसल्येल्या वस्तूंची साफसफाई करा.
शक्यतो पूर्ण अंग झाकणारे कपडे परिधान करा.
खबरदारीचे उपाय...
-पाणी साठविण्याची भांडी आठवड्यातून एकदा कोरडी करा.
-पाणी शक्यतो साठवू नका, साठवलेच तर झाकून ठेवा.
-घराभोवतालचा परिसर स्वच्छ, कोरडा ठेवा.
-वापरात नसल्येल्या वस्तूंची साफसफाई करा.
-शक्यतो पूर्ण अंग झाकणारे कपडे परिधान करा.
विभागात म्हणे एकही रुग्ण नाही!
शहरापाठोपाठ पूर्व विदर्भातही घरोघरी व्हायरल फिव्हरची साथ पसरली आहे. मात्र, धक्कादायक बाब म्हणजे मनपा आरोग्य विभागाच्या लेखी यातल्या एकाचीही नोंद घेण्यात आलेली नाही. त्यामुळे अधिसूचित आजारांच्या यादीवरच प्रश्नचिन्ह लागले आहे. पूर्व विदर्भातल्या आरोग्य विभागाच्या नोंदीनुसार गोंदिया जिल्ह्यात चिकनगुनियाचे आतापर्यंत १३, चंद्रपुरात ७४ संशयितांच्या चाचण्या पॉझिटिव्ह आढळल्या.
मोबाइल अॅप डाउनलोड करा आणि राहा अपडेट