दोघांची एका कार्यक्रमात भेट झाली. नजरेला नजर भिडली. प्रेम झाले. दोन वर्षांपासून दोघेही लग्नाच्या आणाभाका घेत होते. एकमेकांपासून दूर जाणार नाही, अशी शपथही दोघांनी घेतली. मात्र, निय‌तीला ते मान्य नव्हते. गोलूच्या प्रेयसीचा भाऊ व काका काळ बनून पाठलाग करीत होते. शनिवारी मध्यरात्री काळाने गोलूवर झडप घातली. तिघांनी त्याच्यावर दगडाने वार केले. गंभीर जखमी गोलू खाली कोसळला. प्रेयसीने गोलू याला पाणी पाजले अन् ढसाढसा रडली. दगडालाही पाझर फोडणारी ही घटना हिंगणा तालुक्यातील खसरमारी येथे घडली.
गोलूची हत्या केल्याप्रकरणी हिंगणा पोलिसांनी तीन मारेकऱ्यांना अटक केली. त्यांची तीन दिवस पोलिस कोठडी घेण्यात आली आहे. दिनेश त्याचा भाऊ जिनेश व काका कालू ऊर्फ रतन अशी अटकेतील आरोपींची तर अजय ऊर्फ गोलू सोनबाजी वरठी (२२, रा. खासरमारी), असे मृतकाचे नाव आहे.
गोलू हा टाइल्स फिटिंगचे काम करीत होता. प्रेयसीला भेटण्यासाठी तो शुक्रवारी गावात गेला. शनिवारी मध्यरात्री दोघांनी जिल्हा परिषद शाळेत भेटण्याचे ठरविले. शनिवारी मध्यरात्री २ वाजताच्या सुमारास गोलू हा मोटरसायकल घेऊन प्रेयसीच्या घराजवळ गेला. हॉर्न वाजविला. याच वेळी दिनेश उठला. मात्र, त्याने दुर्लक्ष केले. दिनेशी बहीण घराबाहेर गेली. अर्धा तास झाल्यानंतरही ती परतली नाही. त्यामुळे दिनेश याला संशय आला. अडीच वाजताच्या सुमारास दिनेश, त्याचा भाऊ व काकाने दोघांचा शोध सुरू केला. शाळेच्या दरवाजाजवळ गोलूची मोटरसायकल दिसली. तिघे शाळेच्या पटांगणात गेले असता गोलू हा बहिणीसोबत असल्याचे त्यांना दिसले. संतापलेल्या दिनेशने गोलूला मारहाण केली. गोलूला मारू नका, अशी विनवणी दिनेशच्या बहिणीने केली. तिघांनी तिलाही मारहाण केली. गोलूवर दगडाने वार केले.
गोलूने तिघांच्या तावडीतून सुटका केली व मोटरसायकपर्यंत गेला. मोटरसायकलने काही अंतर जात नाही तोच तिघांनी पाठलाग करून त्याला पकडून खाली पाडले. पुन्हा दगडाने त्याच्यावर वार केला. रक्ताच्या थारोळ्यात गोलू खाली कोसळला. याचवेळी त्याची प्रेयसी त्याच्यासाठी पाणी घेऊन आली. त्याला पाणी पाजले. 'तू माझ्यासाठी थांबू नको, तू येथून जा, नाही तर तिघे तुलाही मारतील', असे तो म्हणाला. तिने न जाण्याचा हट्ट धरला, प्रेयसीला तेथून जाण्याची शपथ दिली. जखमी अवस्थेत गोलूला सोडून ती तेथून निघाली. रविवारी सकाळी नागरिकांना गोलू हा जखमी अवस्थेत दिसला. त्यांनी गोलूच्या वडिलांना सांगितले.
दरम्यान, घटनेची माहिती मिळताच हिंगणा पोलिस स्टेशनचे ठाणेदार हेमंतकुमार खराबे यांच्यासह पोलिसांचा ताफा तेथे पोहोचला. गोलू याला मेडिकलमध्ये दाखल केले. डॉक्टरांनी तपासून त्याला मृत घोषित केले. गोलूच्या खिश्यात आढळलेल्या प्रेमपत्रावरून पोलिसांनी मारेकऱ्यांचा सुगावा लावला. तिघांना अटक केली. तिघांना सोमवारी न्यायालयात हजर केले असता न्यायालयाने त्यांची तीन दिवसांसाठी पोलिस कोठडीत रवानगी केली. दरम्यान, या घटनेची मोठी चर्चा शहरात होती. या हृदयद्रावक घटनेमुळे परिसरात हळहळ व्यक्त करण्यात येत आहे.
मोबाइल अॅप डाउनलोड करा आणि राहा अपडेट